Vi har gleda av å melde at Tor Olav Mundal har signert ei intensjonsavtale og er klar til å tre inn i rolla som rektor ved skulen dersom privatistskulen får grønt lys. Mundal vil vere øvste pedagogiske leiar og ha det faglege og administrative ansvaret for skuletilbodet.
Mundal har inngåande kjennskap til det vidaregåande skulesystemet og har vore leiar for ei av dei fremste vidaregåande skuleavdelingane i Noreg. Med brei undervisningserfaring innan historie, norsk, samfunnsfag og kroppsøving, kombinerer han pedagogisk innsikt med leiarkompetanse. Han er særleg opptatt av å sjå kvar enkelt elev og skape eit trygt læringsmiljø der trivsel og meistring står i fokus.
Følg med vidare utover våren for fleire nyheiter om kven som blir tilsett ved Jotunheimen privatistskule.
