Jotunheimen privatistskule er avhengig av finansiering frå det lokale næringslivet, kommunar og privatpersonar for å kunne sette i gang skuletilbodet til hausten. Så langt har innsamlingsprosessen vore prega av stor givarvilje og engasjement. Mange bedrifter har allereie bidrege, og arbeidet med å kome i kontakt med fleire verksemder i Skjåk, Lom og Vågå held fram. Vi har så langt vore i kontakt med omlag 85 % av bedriftene i Ottadalen. Resterande vil bli kontakta i løpet av neste veke.
Vi er stolte og rørte over det enorme kollektive engasjementet i Ottadalen, som har vist ei sterk vilje til å få dette prosjektet realisert. Samhaldet og støtta frå lokalsamfunnet har vore enorm, og er sjølvsagt avgjerande for framgangen så langt. TAFI har stor forståing for at ikkje alle har høve til å bidra til skuleprosjektet, og understrekar at både små og store bidrag er svært viktige og vert høgt verdsette.
TAFI melder med dette at ein, føresett at finansieringa kjem på plass, vil kunne gi grønt ljos for skuleoppstart innan utgangen av mars.
For å få dette i hamn, er vi framleis avhengige av den same givargleda og støtta frå lokalsamfunnet. Privatpersonar som ønskjer å bidra, kan støtte skulen gjennom venneforeininga, som arbeider aktivt for å sikre skulen sine økonomiske rammer.